tujhse baDh kar nigah-e-lutf-o-ata kis ki thi

tujh se baḌh kar nigah-e-lutf-o-atā kis kī thī

is kī ta.abīr magar mere ḳhudā kis kī thī

shahr ke shor meñ sahrāoñ ke sannāTe meñ

maiñ khaḌā soch rahā huuñ ki sadā kis kī thī

maiñ ne ḳhud apne lahū se ye chaman sīñchā thā

mujh se ab pūchh rahe ho ki ḳhatā kis kī thī

maiñ ki ā.īna thā phir sañg-e-malāmat kaisā

dil-e-ḳhūñ-gashta meñ tasvīr-e-butāñ kis kī thī

ab ḳhad-o-ḳhāl naqāboñ meñ nahīñ chhup sakte

jism ḳhud chīḳh uThegā ki qabā kis kī thī

apne lahje meñ koī rañg bharo yā na bharo

log pahchān ga.e tarz-e-adā kis kī thī

tujh se baDh kar nigah-e-lutf-o-ata kis ki thi

is ki tabir magar mere KHuda kis ki thi

shahr ke shor mein sahraon ke sannaTe mein

main khaDa soch raha hun ki sada kis ki thi

main ne KHud apne lahu se ye chaman sincha tha

mujh se ab puchh rahe ho ki KHata kis ki thi

main ki aaina tha phir sang-e-malamat kaisa

dil-e-KHun-gashta mein taswir-e-butan kis ki thi

ab KHad-o-KHal naqabon mein nahin chhup sakte

jism KHud chiKH uThega ki qaba kis ki thi

apne lahje mein koi rang bharo ya na bharo

log pahchan gae tarz-e-ada kis ki thi