tujhse bahut qarib bhi tanha bhi the hamin

tujh se bahut qarīb bhī tanhā bhī the hamīñ

the ābrū-e-ishq pa rusvā bhī the hamīñ

āñkhoñ meñ ḳhuun thā ki zamīñ thī lahū lahū

zanjīr-e-ġham pahan ke tamāshā bhī the hamīñ

har har qadam pe ik na.ī dīvār thī khaḌī

us raat ke safar meñ ujālā bhī the hamīñ

ma.alūm thā ye ishq nahīñ maat kā hai khel

paspā hue the ham hī havāla bhī the hamīñ

ma.alūm thā ki vahshateñ apnī bisāt haiñ

ma.alūm thā ki shaam kā taara bhī the hamīñ

āñkhoñ meñ ḳhvāb chubhte raheñge tamām umr

ye dard-e-lā-davā thā masīhā bhī the hamīñ

ab yaad bhī na aao ki va.ada bhī thā yahī

dasht-e-balā meñ va.ada-e-fardā bhī the hamīñ

ai sub.h-e-nau-bahār kabhī tū idhar bhī aa

ahbāb jānte haiñ ki tujh sā bhī the hamīñ

tujh se bahut qarib bhi tanha bhi the hamin

the aabru-e-ishq pa ruswa bhi the hamin

aankhon mein KHun tha ki zamin thi lahu lahu

zanjir-e-gham pahan ke tamasha bhi the hamin

har har qadam pe ek nai diwar thi khaDi

us raat ke safar mein ujala bhi the hamin

malum tha ye ishq nahin mat ka hai khel

paspa hue the hum hi hawala bhi the hamin

malum tha ki wahshaten apni bisat hain

malum tha ki sham ka tara bhi the hamin

aankhon mein KHwab chubhte rahenge tamam umr

ye dard-e-la-dawa tha masiha bhi the hamin

ab yaad bhi na aao ki wada bhi tha yahi

dasht-e-bala mein wada-e-farda bhi the hamin

ai subh-e-nau-bahaar kabhi tu idhar bhi aa

ahbab jaante hain ki tujh sa bhi the hamin