tujhse main mujhse aashna tum ho

tujh se maiñ mujh se āshnā tum ho

maiñ huuñ ḳhushbū magar havā tum ho

maiñ likhāvaT tumhāre hāthoñ kī

merī taqdīr kā likhā tum ho

tum agar sach ho, maiñ bhī jhuuT nahīñ

aks maiñ, merā aa.ina tum ho

be-ḳhudī ne mirā bharam toḌā

maiñ samajhtā rahā ḳhudā tum ho

maiñ huuñ mujrim, mire ho munsif tum

maiñ ḳhatā huuñ, mirī sazā tum ho

siip kī aas ban ke chāhūñ tumheñ

laa.e jo motī vo ghaTā tum ho

apnī majbūriyoñ kā rañj nahīñ

bevafā maiñ huuñ, bā-vafā tum ho

rog ban kar paḌā huā hai 'kañval'

tum davā ho, mirī duā tum ho

tujh se main mujh se aashna tum ho

main hun KHushbu magar hawa tum ho

main likhawaT tumhaare hathon ki

meri taqdir ka likha tum ho

tum agar sach ho, main bhi jhuT nahin

aks main, mera aaina tum ho

be-KHudi ne mera bharam toDa

main samajhta raha KHuda tum ho

main hun mujrim, mere ho munsif tum

main KHata hun, meri saza tum ho

sip ki aas ban ke chahun tumhein

lae jo moti wo ghaTa tum ho

apni majburiyon ka ranj nahin

bewafa main hun, ba-wafa tum ho

rog ban kar paDa hua hai 'kanwal'

tum dawa ho, meri dua tum ho