tujhse mile baghair ye mujhko pata na tha

tujh se mile baġhair ye mujh ko patā na thā

vasl-o-firāq kyā hai ye maiñ jāntā na thā

āzād ho gayā maiñ jahāñ ke ḳhayāl se

lekin tirā ḳhayāl mujhe chhoḌtā na thā

maiñ us ko dekhtā thā baḌe ishtiyāq se

lekin kabhī vo merī taraf dekhtā na thā

tum kyā ḳhafā hue ki ḳhafā ho gayā jahāñ

jab tum ḳhafā na the to koī bhī ḳhafā na thā

ik terī yaad hī thī mirī manzil-e-talab

varna safar meñ koī mirā rahnumā na thā

mahrūmiyāñ likhī thiiñ hamāre nasīb meñ

dil par hamāre harf-e-masarrat likhā na thā

'ma.asūm' ye bhī apne muqaddar kī baat hai

un kā milā surāġh to apnā patā na thā

tujh se mile baghair ye mujh ko pata na tha

wasl-o-firaq kya hai ye main jaanta na tha

aazad ho gaya main jahan ke KHayal se

lekin tera KHayal mujhe chhoDta na tha

main us ko dekhta tha baDe ishtiyaq se

lekin kabhi wo meri taraf dekhta na tha

tum kya KHafa hue ki KHafa ho gaya jahan

jab tum KHafa na the to koi bhi KHafa na tha

ek teri yaad hi thi meri manzil-e-talab

warna safar mein koi mera rahnuma na tha

mahrumiyan likhi thin hamare nasib mein

dil par hamare harf-e-masarrat likha na tha

'masum' ye bhi apne muqaddar ki baat hai

un ka mila suragh to apna pata na tha