tujhse milunga phir kabhi KHwab-o-KHayal bhi nahin

tujh se milūñgā phir kabhī ḳhvāb-o-ḳhayāl bhī nahīñ

chehre pe in dinoñ magar gard-e-malāl bhī nahīñ

ā.īna-e-sifāt meñ zaat kā aks kyā mile

us kī talāsh ho kahāñ jis kī misāl bhī nahīñ

tere sitam kī guftugū tere karam kī justujū

sub.h-e-firāq bhī nahīñ shām-e-visāl bhī nahīñ

mujh ko talab se kyā milā dard-o-sarāb āgahī

merī nazar meñ mo'tabar shahr-e-jamāl bhī nahīñ

vo bhī the din ki aa.ina ban ke vo sāmne rahe

ye bhī hai ab ki ḳhvāhish-e-pursish-e-hāl bhī nahīñ

tujh se milunga phir kabhi KHwab-o-KHayal bhi nahin

chehre pe in dinon magar gard-e-malal bhi nahin

aaina-e-sifat mein zat ka aks kya mile

us ki talash ho kahan jis ki misal bhi nahin

tere sitam ki guftugu tere karam ki justuju

subh-e-firaq bhi nahin sham-e-visal bhi nahin

mujh ko talab se kya mila dard-o-sarab aagahi

meri nazar mein mo'tabar shahr-e-jamal bhi nahin

wo bhi the din ki aaina ban ke wo samne rahe

ye bhi hai ab ki KHwahish-e-pursish-e-haal bhi nahin