تجھ سے ناطہ توڑ لیں گے اور بڑا روئیں گے ہم

تجھ سے ناطہ توڑ لیں گے اور بڑا روئیں گے ہم

دل کو ہلکا یوں کریں گے بارہا روئیں گے ہم

آہٹوں اور دستکوں پر کان ہیں رکھے ہوئے

کب سے تیرے منتظر ہیں آ بھی جا روئیں گے ہم

سوکھ ہی جائے گا دریا ہم اگر ہنستے رہے

اس کی خاطر جتنا ہم سے بن پڑا روئیں گے ہم

تیری یادوں کی ہو آمد اور دل میں کچھ نہ ہو

مسکرائیں گے خوشی میں مبتلا روئیں گے ہم

غم خرابے تیرگی آنسو خلا آشفتگی

اور بھی کچھ ہو اگر تو وہ بھی لا روئیں گے ہم

ایک منظر سوچ کر جس کو یہ سارے رو پڑیں

حضرت ایوبؔ کا قصہ سنا روئیں گے ہم