tujhse nata toD lenge aur baDa roenge hum

tujh se naata toḌ leñge aur baḌā ro.eñge ham

dil ko halkā yuuñ kareñge bārhā ro.eñge ham

āhaToñ aur dastakoñ par kaan haiñ rakkhe hue

kab se tere muntazir haiñ aa bhī jā ro.eñge ham

suukh hī jā.egā dariyā ham agar hañste rahe

us kī ḳhātir jitnā ham se ban paḌā ro.eñge ham

terī yādoñ kī ho aamad aur dil meñ kuchh na ho

muskurā.eñge ḳhushī meñ mubtalā ro.eñge ham

ġham ḳharābe tīrgī aañsū ḳhalā āshuftagī

aur bhī kuchh ho agar to vo bhī lā ro.eñge ham

ek manzar soch kar jis ko ye saare ro paḌeñ

hazrat-e-'ayyūb' kā qissa sunā ro.eñge ham

tujh se nata toD lenge aur baDa roenge hum

dil ko halka yun karenge barha roenge hum

aahaTon aur dastakon par kan hain rakkhe hue

kab se tere muntazir hain aa bhi ja roenge hum

sukh hi jaega dariya hum agar hanste rahe

us ki KHatir jitna hum se ban paDa roenge hum

teri yaadon ki ho aamad aur dil mein kuchh na ho

muskuraenge KHushi mein mubtala roenge hum

gham KHarabe tirgi aansu KHala aashuftagi

aur bhi kuchh ho agar to wo bhi la roenge hum

ek manzar soch kar jis ko ye sare ro paDen

hazrat-e-'ayyub' ka qissa suna roenge hum