tujhse zalim ko apna yar kiya

tujh se zālim ko apnā yaar kiyā

ham ne kyā jabr iḳhtiyār kiyā

misl-e-sīmāb be-qarār rahe

ek jā ham ne kab qarār kiyā

āñkheñ pathrā ga.iiñ ai sañgīñ-dil

yaañ talak terā intizār kiyā

tū jo kahtā hai jald ā.ūñgā

maiñ ne kyā terā e'tibār kiyā

jaib to kyā hai nāseho ham ne

chaak siine ko ġhuncha-vār kiyā

nazar aa.e qayās se bāhar

dil ke zaḳhmoñ ko jab shumār kiyā

ātish-e-ishq ne ba-rañg-e-sipand

dāna-e-dil ko be-qarār kiyā

tū vafā se na dar-guzar 'joshish'

us ne go jaur iḳhtiyār kiyā

tujh se zalim ko apna yar kiya

hum ne kya jabr iKHtiyar kiya

misl-e-simab be-qarar rahe

ek ja hum ne kab qarar kiya

aankhen pathra gain ai sangin-dil

yan talak tera intizar kiya

tu jo kahta hai jald aaunga

main ne kya tera e'tibar kiya

jaib to kya hai naseho hum ne

chaak sine ko ghuncha-war kiya

nazar aae qayas se bahar

dil ke zaKHmon ko jab shumar kiya

aatish-e-ishq ne ba-rang-e-sipand

dana-e-dil ko be-qarar kiya

tu wafa se na dar-guzar 'joshish'

us ne go jaur iKHtiyar kiya