tujhe ai qais ek jalwa nazar aata to hai dil mein

tujhe ai qais ik jalva nazar aatā to hai dil meñ

phir ab kyā bahs lailā ghar meñ baiThī hai ki mahfil meñ

mohabbat bhī hai marg-e-nā-gahāñ kā shauq bhī dil meñ

zarā dekho hamārī mahviyat tahsīl-e-hāsil meñ

ilāhī mushkileñ āsān kar us zaat ke sadqe

zabāñ par merī jis kā naam aa jaatā hai mushkil meñ

kahīñ pheñko mujhe ulfat meñ jab maiñ amn kho baiThā

vahī mañjdhār kī maujoñ meñ hai jo ḳhāk-e-sāhil meñ

adā.eñ un kī sab qātil nahīñ aisī bhī dekhī haiñ

ki paidā ruuh meñ bālīdgī ho tāzgī dil meñ

ye tanz-e-tark-e-ulfat gosha-gīr-e-nā-umīdī par

nahīñ yuuñ chuTkiyāñ lete nahīñ dukhte hue dil meñ

mirī har saañs goyā ek gām-e-sa.ī hai 'mānī'

ye maiñ jiitā nahīñ masrūf huuñ qat.a-e-manāzil meñ

tujhe ai qais ek jalwa nazar aata to hai dil mein

phir ab kya bahs laila ghar mein baiThi hai ki mahfil mein

mohabbat bhi hai marg-e-na-gahan ka shauq bhi dil mein

zara dekho hamari mahwiyat tahsil-e-hasil mein

ilahi mushkilen aasan kar us zat ke sadqe

zaban par meri jis ka nam aa jata hai mushkil mein

kahin phenko mujhe ulfat mein jab main amn kho baiTha

wahi manjdhaar ki maujon mein hai jo KHak-e-sahil mein

adaen un ki sab qatil nahin aisi bhi dekhi hain

ki paida ruh mein baalidgi ho tazgi dil mein

ye tanz-e-tark-e-ulfat gosha-gir-e-na-umidi par

nahin yun chuTkiyan lete nahin dukhte hue dil mein

meri har sans goya ek gam-e-sai hai 'mani'

ye main jita nahin masruf hun qata-e-manazil mein