تجھے دیکھے ذرا بھی جس کو شک ہو اس کی صنعت میں

تجھے دیکھے ذرا بھی جس کو شک ہو اس کی صنعت میں

نظر آتا ہے قدرت کا نمونہ تیری صورت میں

فنا کے بعد بھی روشن رہے گا چہرۂ عاشق

نہ فرق آئے گا ہرگز تیرے بیماروں کی صورت میں

نتیجہ خاک میں مل جائے گا شب زندہ داری کا

اگر بھولے سے بھی جھپکی پلک شب ہائے فرقت میں

مزہ آتا ہے دل کو بلبل شیدا کے نالوں سے

حوالے میرے افسانوں کے ہیں اس کی حکایت میں

زہے بخت رسا ان کے جو پہونچے قرب میں تیرے

بڑے آرام سے ہیں سایۂ دامان دولت میں

نظر کو کون قصر یار تک پہنچائے دیتا ہے

لگا دی کس نے ایسی دوربیں چشم بصیرت میں

بناتا ہے غبار دشت اپنی چشم کا سرمہ

ترے مجنوں کو اے لیلیٰ نئی سوجھی ہے وحشت میں

مے گلگوں کی واعظ سے مذمت سن کے ہنس دینا

چلا آتا ہے یہ دستور یاران طریقت میں

میں اے بیتابؔ خود مجبور ہوں کچھ بن نہیں پڑتا

ٹپک پڑتے ہیں آنسو خود بخود آنکھوں سے فرقت میں