tujhe dekhe zara bhi jis ko shak ho uski sanat mein

tujhe dekhe zarā bhī jis ko shak ho us kī san.at meñ

nazar aatā hai qudrat kā namūna terī sūrat meñ

fanā ke baad bhī raushan rahegā chehra-e-āshiq

na farq aa.egā hargiz tere bīmāroñ kī sūrat meñ

natīja ḳhaak meñ mil jā.egā shab-zinda-dārī kā

agar bhūle se bhī jhapkī palak shab-hā-e-furqat meñ

maza aatā hai dil ko bulbul-e-shaidā ke nāloñ se

havāle mere afsānoñ ke haiñ us kī hikāyat meñ

zahe-baḳht-e-rasā un ke jo pahoñche qurb meñ tere

baḌe ārām se haiñ sāya-e-dāmān-e-daulat meñ

nazar ko kaun qasr-e-yār tak pahuñchā.e detā hai

lagā dī kis ne aisī dūrbīñ chashm-e-basīrat meñ

banātā hai ġhubār-e-dasht apnī chashm kā surma

tire majnūñ ko ai lailā na.ī sūjhī hai vahshat meñ

mai-e-gul-gūñ kī vaa.iz se mazammat sun ke hañs denā

chalā aatā hai ye dastūr yārān-e-tarīqat meñ

maiñ ai 'betāb' ḳhud majbūr huuñ kuchh ban nahīñ paḌtā

Tapak paḌte haiñ aañsū ḳhud-baḳhud āñkhoñ se furqat meñ

tujhe dekhe zara bhi jis ko shak ho us ki sanat mein

nazar aata hai qudrat ka namuna teri surat mein

fana ke baad bhi raushan rahega chehra-e-ashiq

na farq aaega hargiz tere bimaron ki surat mein

natija KHak mein mil jaega shab-zinda-dari ka

agar bhule se bhi jhapki palak shab-ha-e-furqat mein

maza aata hai dil ko bulbul-e-shaida ke nalon se

hawale mere afsanon ke hain us ki hikayat mein

zahe-baKHt-e-rasa un ke jo pahonche qurb mein tere

baDe aaram se hain saya-e-daman-e-daulat mein

nazar ko kaun qasr-e-yar tak pahunchae deta hai

laga di kis ne aisi durbin chashm-e-basirat mein

banata hai ghubar-e-dasht apni chashm ka surma

tere majnun ko ai laila nai sujhi hai wahshat mein

mai-e-gul-gun ki waiz se mazammat sun ke hans dena

chala aata hai ye dastur yaran-e-tariqat mein

main ai 'betab' KHud majbur hun kuchh ban nahin paDta

Tapak paDte hain aansu KHud-baKHud aankhon se furqat mein