tujhe gar pas-e-ghairat ai sitamgar ho nahin sakta

tujhe gar pās-e-ġhairat ai sitamgar ho nahīñ saktā

to dil bhī shākī-e-ta.azīr-e-ḳhanjar ho nahīñ saktā

maiñ tark-e-bāda-noshī ke liye muddat se koshāñ huuñ

magar ye kaam puurā qabl-e-mahshar ho nahīñ saktā

bulā kar baat pūchheñ rū-ba-rū apne to ro denā

dalā.el kā asar kuchh is se behtar ho nahīñ saktā

shikāyat tujh se kyā saaqī ki hai tāḳhīr kā aadī

sitam duniyā meñ lekin is se baḌh kar ho nahīñ saktā

sukūn-o-zabt kī to ham-nashīñ maiñ intihā kar duuñ

magar mujh ko vo yūsuf ab mayassar ho nahīñ saktā

pilā.e jā ki maiñ mad.hosh ho jā.ūñ to tū maane

ki mai-noshī meñ koī mujh se baḌh kar ho nahīñ saktā

suḳhan-sāzī meñ lāzim hai kamāl-e-ilm-o-fan honā

mahz tuk-bandiyoñ se koī shā.er ho nahīñ saktā

hunar-mandoñ kī har majlis se ye āvāz aatī hai

ki nādāñ kā koī duniyā meñ 'rahbar' ho nahīñ saktā

tujhe gar pas-e-ghairat ai sitamgar ho nahin sakta

to dil bhi shaki-e-tazir-e-KHanjar ho nahin sakta

main tark-e-baada-noshi ke liye muddat se koshan hun

magar ye kaam pura qabl-e-mahshar ho nahin sakta

bula kar baat puchhen ru-ba-ru apne to ro dena

dalael ka asar kuchh is se behtar ho nahin sakta

shikayat tujh se kya saqi ki hai taKHir ka aadi

sitam duniya mein lekin is se baDh kar ho nahin sakta

sukun-o-zabt ki to ham-nashin main intiha kar dun

magar mujh ko wo yusuf ab mayassar ho nahin sakta

pilae ja ki main madhosh ho jaun to tu mane

ki mai-noshi mein koi mujh se baDh kar ho nahin sakta

suKHan-sazi mein lazim hai kamal-e-ilm-o-fan hona

mahz tuk-bandiyon se koi shaer ho nahin sakta

hunar-mandon ki har majlis se ye aawaz aati hai

ki nadan ka koi duniya mein 'rahbar' ho nahin sakta