tujhe husn ne kya se kya kar diya

tujhe husn ne kyā se kyā kar diyā

idhar dekh o but ḳhudā kar diyā

tabī.at meñ paidā maza kar diyā

mohabbat ne dard-āshnā kar diyā

bahut dostī jin se gāḌhī chhanī

unhīñ ne maza kirkirā kar diyā

maiñ qurbān ai nā-umīdī tire

mire dil ko be-mudda.ā kar diyā

dam-e-naz.a aa.e ye kah kar chale

jo va.ada kiyā thā vafā kar diyā

idhar aa gale se lagā luuñ tujhe

mirī jaan kis ne ḳhafā kar diyā

sabā lā ke tū ne dar-e-yār par

mirī ḳhaak ko kīmiyā kar diyā

ilāhī sazā hai ye kis jurm kī

ki is par mujhe mubtalā kar diyā

bahut marne jiine ke jhagḌe rahe

tire tiir ne faisla kar diyā

milā aaj 'hāmid' ajab haal thā

use ishq ne kyā se kyā kar diyā

tujhe husn ne kya se kya kar diya

idhar dekh o but KHuda kar diya

tabiat mein paida maza kar diya

mohabbat ne dard-ashna kar diya

bahut dosti jin se gaDhi chhani

unhin ne maza kirkira kar diya

main qurban ai na-umidi tere

mere dil ko be-muddaa kar diya

dam-e-naza aae ye kah kar chale

jo wada kiya tha wafa kar diya

idhar aa gale se laga lun tujhe

meri jaan kis ne KHafa kar diya

saba la ke tu ne dar-e-yar par

meri KHak ko kimiya kar diya

ilahi saza hai ye kis jurm ki

ki is par mujhe mubtala kar diya

bahut marne jine ke jhagDe rahe

tere tir ne faisla kar diya

mila aaj 'hamid' ajab haal tha

use ishq ne kya se kya kar diya