tujhe jab se ai shahid-e-tur dekha

tujhe jab se ai shāhid-e-tūr dekhā

jidhar aañkh Daalī udhar nuur dekhā

ajab ahl-e-ulfat kā dastūr dekhā

vafūr-e-alam meñ bhī masrūr dekhā

jo paayā to ab tujh ko nazdīk paayā

na dekhā thā jab tak tujhe duur dekhā

huī aam aisī tirī jalva-rezī

yahāñ tuur dekhā vahāñ tuur dekhā

basīrat mirī chashm-e-haq-bīñ kī dekho

jidhar ruḳh kiyā nuur hī nuur dekhā

mirī dānish-o-āgahī kā burā ho

tujhe duur samjhā tujhe duur dekhā

ai 'zā.iq' na kyoñ ho ye ab rashk-e-dillī

bharā ahl-e-fan se ye bangalore dekhā

tujhe jab se ai shahid-e-tur dekha

jidhar aankh Dali udhar nur dekha

ajab ahl-e-ulfat ka dastur dekha

wafur-e-alam mein bhi masrur dekha

jo paya to ab tujh ko nazdik paya

na dekha tha jab tak tujhe dur dekha

hui aam aisi teri jalwa-rezi

yahan tur dekha wahan tur dekha

basirat meri chashm-e-haq-bin ki dekho

jidhar ruKH kiya nur hi nur dekha

meri danish-o-agahi ka bura ho

tujhe dur samjha tujhe dur dekha

ai 'zaiq' na kyon ho ye ab rashk-e-dilli

bhara ahl-e-fan se ye bangalore dekha