tujhe KHabar hai qadam qadam par jo parsaon ka silsila hai

tujhe ḳhabar hai qadam qadam par jo pārsāoñ kā silsila hai

ḳhudā-e-vāhid tirī zamīñ par ka.ī ḳhudāoñ kā silsila hai

chimaT ga.ī haiñ burī tarah se hamāre abdān in kī zad meñ

lahū hamāre pe pal rahī haiñ ye kin balāoñ kā silsila hai

hameñ hamārī hī nafratoñ ne tabāh-o-barbād kar diyā hai

bahār-rut hai magar chaman meñ vahī ḳhizāoñ kā silsila hai

ḳhudā nahīñ haiñ magar zamīñ pe ḳhudā ke jaisī sifāt un kī

tamām rishtoñ meñ is jahāñ ke 'ajīb maaoñ kā silsila hai

vo ḳhaak oḌhī hai jab se maañ ne vo raunaqeñ ab nahīñ haiñ ghar meñ

na barkatoñ kī vo bārisheñ haiñ na vo du'āoñ kā silsila hai

badaltā rahtā hai vaqt sab kā 'nadīm' is se mafar nahīñ hai

kabhī hai tūfāñ kabhī hai bārish kabhī havāoñ kā silsila hai

tujhe KHabar hai qadam qadam par jo parsaon ka silsila hai

KHuda-e-wahid teri zamin par kai KHudaon ka silsila hai

chimaT gai hain buri tarah se hamare abdan in ki zad mein

lahu hamare pe pal rahi hain ye kin balaon ka silsila hai

hamein hamari hi nafraton ne tabah-o-barbaad kar diya hai

bahaar-rut hai magar chaman mein wahi KHizaon ka silsila hai

KHuda nahin hain magar zamin pe KHuda ke jaisi sifat un ki

tamam rishton mein is jahan ke 'ajib maon ka silsila hai

wo KHak oDhi hai jab se man ne wo raunaqen ab nahin hain ghar mein

na barkaton ki wo barishen hain na wo du'aon ka silsila hai

badalta rahta hai waqt sab ka 'nadim' is se mafar nahin hai

kabhi hai tufan kabhi hai barish kabhi hawaon ka silsila hai