tujhe kuchh bhi KHuda ka tars hai ai sang-dil tarsa

tujhe kuchh bhī ḳhudā kā tars hai ai sañg-dil tarsā

hamārā dil bahut tarsā are tarsā na ab tarsā

maiñ us par mubtalā vo ġhair maz.hab shoḳh ab tarsā

qayāmat hai musalmāñ āshiq aur ma.ashūq hai tarsā

faqat tīr-e-nigah se to na dil kī aarzū niklī

tire qurbāñ lagā ab ke koī is se bhī behtar sā

na jā.ūñ maiñ to us ke paas lekin kyā karūñ yaaro

yakāyak kuchh jigar meñ aa ke lag jaatā hai nashtar sā

pukārā duur se de kar safīr us ne to kyā merā

dhaḌak kar yak-ba-yak siine meñ dil loTā kabūtar sā

huā bīmār tere ishq meñ jo charḳh-e-chārum par

masīhā paḌh rahā hai kuchh bichhā kar apnā bistar sā

'nazīr' ik do gile karne bahut hote haiñ ḳhūbāñ se

chalo ab chup raho bas khol baiThe tum to daftar sā

tujhe kuchh bhi KHuda ka tars hai ai sang-dil tarsa

hamara dil bahut tarsa are tarsa na ab tarsa

main us par mubtala wo ghair mazhab shoKH ab tarsa

qayamat hai musalman aashiq aur mashuq hai tarsa

faqat tir-e-nigah se to na dil ki aarzu nikli

tere qurban laga ab ke koi is se bhi behtar sa

na jaun main to us ke pas lekin kya karun yaro

yakayak kuchh jigar mein aa ke lag jata hai nashtar sa

pukara dur se de kar safir us ne to kya mera

dhaDak kar yak-ba-yak sine mein dil loTa kabutar sa

hua bimar tere ishq mein jo charKH-e-chaarum par

masiha paDh raha hai kuchh bichha kar apna bistar sa

'nazir' ek do gile karne bahut hote hain KHuban se

chalo ab chup raho bas khol baiThe tum to daftar sa