تجھے کیا بتاؤں میں ہم نشیں مری زندگی کا جو حال ہے

تجھے کیا بتاؤں میں ہم نشیں مری زندگی کا جو حال ہے

نہ مسرتوں کی کوئی خوشی نہ غموں کا کوئی ملال ہے

یہ عجب طرح کی ہے زندگی نہ فراق ہے نہ وصال ہے

انہیں چھوڑ دوں یہ روا نہیں انہیں پا سکوں یہ محال ہے

یہ تو سچ ہے ناصح محترم غم دل کا چاہئے کچھ بھرم

نہ ہو مستحق جفا بھی جب تو وفا کی کس کو مجال ہے

مری ہر نظر سے انہیں گلہ ہے عذاب جاں مری ہر ادا

کرم و وفا کا یہ ہے صلہ یہ محبتوں کا مآل ہے

مری بات بات میں عیب ہے مرا ہر خلوص فریب ہے

مرا دل بھی کتنا عجیب ہے مجھے پھر بھی ان کا خیال ہے

جہاں اشک قطرۂ آب ہوں جہاں نالے وجہ عتاب ہوں

وہاں بار بار صدائے غم یہ نیاز غم کا کمال ہے