tujhe kya bataun main ham-nashin meri zindagi ka jo haal hai

tujhe kyā batā.ūñ maiñ ham-nashīñ mirī zindagī kā jo haal hai

na masarratoñ kī koī ḳhushī na ġhamoñ kā koī malāl hai

ye ajab tarah kī hai zindagī na firāq hai na visāl hai

unheñ chhoḌ duuñ ye ravā nahīñ unheñ pā sakūñ ye muhāl hai

ye to sach hai nāseh-e-mohtaram ġham-e-dil kā chāhiye kuchh bharam

na ho mustahqiq-e-jafā bhī jab to vafā kī kis ko majāl hai

mirī har nazar se unheñ gila hai azāb-e-jāñ mirī har adā

karam-o-vafā kā ye hai sila ye mohabbatoñ kā ma.aal hai

mirī baat baat meñ aib hai mirā har ḳhulūs fareb hai

mirā dil bhī kitnā ajiib hai mujhe phir bhī un kā ḳhayāl hai

jahāñ ashk qatra-e-āb hoñ jahāñ naale vaj.h-e-itāb hoñ

vahāñ bār-bār sadā-e-ġham ye niyāz-e-ġham kā kamāl hai

tujhe kya bataun main ham-nashin meri zindagi ka jo haal hai

na masarraton ki koi KHushi na ghamon ka koi malal hai

ye ajab tarah ki hai zindagi na firaq hai na visal hai

unhen chhoD dun ye rawa nahin unhen pa sakun ye muhaal hai

ye to sach hai naseh-e-mohtaram gham-e-dil ka chahiye kuchh bharam

na ho mustahqiq-e-jafa bhi jab to wafa ki kis ko majal hai

meri har nazar se unhen gila hai azab-e-jaan meri har ada

karam-o-wafa ka ye hai sila ye mohabbaton ka maal hai

meri baat baat mein aib hai mera har KHulus fareb hai

mera dil bhi kitna ajib hai mujhe phir bhi un ka KHayal hai

jahan ashk qatra-e-ab hon jahan nale wajh-e-itab hon

wahan bar-bar sada-e-gham ye niyaz-e-gham ka kamal hai