tujhe main bhul jaana chahta hun

tujhe maiñ bhuul jaanā chāhtā huuñ

yuuñ dil ko āzmānā chāhtā huuñ

na chheḌo aaj dard-o-ġham ke qisse

maiñ khul kar muskurānā chāhtā huuñ

mirī tahvīl meñ jo bhī hai yaaro

tumhīñ pe sab luTānā chāhtā huuñ

bahut bojhal se lagte haiñ manāzir

maiñ un se duur jaanā chāhtā huuñ

ḳhayāl-o-fikr kā dam ghuT rahā hai

na.ī duniyā banānā chāhtā huuñ

kisī kī yaad kī ḳhushbū ko 'anjum'

maiñ rag rag meñ basānā chāhtā huuñ

tujhe main bhul jaana chahta hun

yun dil ko aazmana chahta hun

na chheDo aaj dard-o-gham ke qisse

main khul kar muskurana chahta hun

meri tahwil mein jo bhi hai yaro

tumhin pe sab luTana chahta hun

bahut bojhal se lagte hain manazir

main un se dur jaana chahta hun

KHayal-o-fikr ka dam ghuT raha hai

nai duniya banana chahta hun

kisi ki yaad ki KHushbu ko 'anjum'

main rag rag mein basana chahta hun