tujhe main milun to kahan milun mera tujhse rabt muhaal hai

tujhe maiñ milūñ to kahāñ milūñ mirā tujh se rabt muhāl hai

tirī bazm bazm-e-nashāt hai mirī bazm bazm-e-ḳhayāl hai

tirā dil nahīñ tire haath meñ mujhe dekh maiñ huuñ girafta-dil

mirā jabr merī najāt hai ye mire hunar kā kamāl hai

na tū ham-zabāñ na tū ham-zamāñ mirā tujh se kaisā mo.āmla

mirā ahd ahd-e-kamāl-e-ġham tirā ahd ahd-e-zavāl hai

maiñ huuñ kam-talab tū hai kam-nazar maiñ navā-e-dil tū havā-e-dil

mirī dastaras meñ haiñ kul zamāñ tū asīr-e-lamha-e-hāl hai

vo hai naqd-e-zar tirī aarzū ye hai naqd-e-dil mirī aarzū

tirā naqd rizq-e-harām hai mirā naqd rizq-e-halāl hai

tirī justujū mirī gumrahī tirī intihā mirī ibtidā

tirī ziist terā javāb hai mirī ziist merā savāl hai

tujhe kārobār ko din milā mujhe kāhish-e-shab-e-ġham milī

mujhe ḳhvāhish-e-ġham-e-āgahī tujhe ḳhvāhish-e-zar-o-māl hai

mujhe sun tarāna-e-dard meñ mujhe dekh chehra-e-zard meñ

mujhe DhūñD ġham kī panāh meñ ki vo merā shāmil-e-hāl hai

maiñ huuñ 'bāqar' aise maqām par nahīñ kam-nazar kā jahāñ guzar

ye ajiib manzil-e-shauq hai ki na hijr hai na visāl hai

tujhe main milun to kahan milun mera tujh se rabt muhaal hai

teri bazm bazm-e-nashat hai meri bazm bazm-e-KHayal hai

tera dil nahin tere hath mein mujhe dekh main hun girafta-dil

mera jabr meri najat hai ye mere hunar ka kamal hai

na tu ham-zaban na tu ham-zaman mera tujh se kaisa moamla

mera ahd ahd-e-kamal-e-gham tera ahd ahd-e-zawal hai

main hun kam-talab tu hai kam-nazar main nawa-e-dil tu hawa-e-dil

meri dastaras mein hain kul zaman tu asir-e-lamha-e-haal hai

wo hai naqd-e-zar teri aarzu ye hai naqd-e-dil meri aarzu

tera naqd rizq-e-haram hai mera naqd rizq-e-halal hai

teri justuju meri gumrahi teri intiha meri ibtida

teri zist tera jawab hai meri zist mera sawal hai

tujhe karobar ko din mila mujhe kahish-e-shab-e-gham mili

mujhe KHwahish-e-gham-e-agahi tujhe KHwahish-e-zar-o-mal hai

mujhe sun tarana-e-dard mein mujhe dekh chehra-e-zard mein

mujhe DhunD gham ki panah mein ki wo mera shamil-e-haal hai

main hun 'baqar' aise maqam par nahin kam-nazar ka jahan guzar

ye ajib manzil-e-shauq hai ki na hijr hai na visal hai