tujhe pa kar bhi jab koi kami mahsus hoti hai

tujhe pā kar bhī jab koī kamī mahsūs hotī hai

to phir ye saañs bhī ruktī huī mahsūs hotī hai

jo kahnā hī nahīñ us kā ishāra kyuuñ diyā jaa.e

ki aisī baat to kuchh aur bhī mahsūs hotī hai

adīm-ul-fursatī shiddat se us kā yaad aa jaanā

ġhanīmat hai agar ye tishnagī mahsūs hotī hai

palaT kar aa ga.e ho tum to kyuuñ aa.e nahīñ lagte

tumhārī aañkh meñ kyuuñ gard sī mahsūs hotī hai

vagarna bojh hai jis ko liye phirnā hai kāñdhe par

kareñ mahsūs to ye zindagī mahsūs hotī hai

shajar vo bhī jise sīñchā ho apnā ḳhuun de de kar

kabhī us kī bhī chhāñv ajnabī mahsūs hotī hai

ye mere ḳhvāb haiñ jo saaya karte haiñ mire sar par

mujhe is dopahar meñ chhāñv sī mahsūs hotī hai

kisī kī guftugū ke darmiyāñ aksar na jaane kyuuñ

kahīñ gahrī sī koī ḳhāmushī mahsūs hotī hai

zamīñ terī tarah maiñ bhī safar meñ huuñ ki jaise tū

kabhī Thahrī nahīñ Thahrī huī mahsūs hotī hai

tujhe pa kar bhi jab koi kami mahsus hoti hai

to phir ye sans bhi rukti hui mahsus hoti hai

jo kahna hi nahin us ka ishaara kyun diya jae

ki aisi baat to kuchh aur bhi mahsus hoti hai

adim-ul-fursati shiddat se us ka yaad aa jaana

ghanimat hai agar ye tishnagi mahsus hoti hai

palaT kar aa gae ho tum to kyun aae nahin lagte

tumhaari aankh mein kyun gard si mahsus hoti hai

wagarna bojh hai jis ko liye phirna hai kandhe par

karen mahsus to ye zindagi mahsus hoti hai

shajar wo bhi jise sincha ho apna KHun de de kar

kabhi us ki bhi chhanw ajnabi mahsus hoti hai

ye mere KHwab hain jo saya karte hain mere sar par

mujhe is dopahar mein chhanw si mahsus hoti hai

kisi ki guftugu ke darmiyan aksar na jaane kyun

kahin gahri si koi KHamushi mahsus hoti hai

zamin teri tarah main bhi safar mein hun ki jaise tu

kabhi Thahri nahin Thahri hui mahsus hoti hai