tujhe rahe na rahe rabt-e-bahami ka KHayal

tujhe rahe na rahe rabt-e-bāhamī kā ḳhayāl

magar mujhe to hai ādāb-e-dostī kā ḳhayāl

taḌap rahā thā tirī bazm-e-nāz meñ lekin

kisī ne bhī na kiyā merī bebasī kā ḳhayāl

pahuñch sakegā vo kis tarah apnī manzil tak

jise zarā bhī na ho apnī kajravī kā ḳhayāl

mujhe yaqīn hai pā legā manziloñ ke nishāñ

vo kārvāñ ki na ho jis ko gumrahī kā ḳhayāl

milo to dost bano varna sāzisheñ hī karo

ki dostī meñ na shāmil ho dushmanī kā ḳhayāl

rah-e-hayāt meñ ham to abhī haiñ nau-āmoz

ḳhudā kare ki na paidā ho rahbarī kā ḳhayāl

'kamāl' jaise jahāñ hoñge chand ahl-e-junūñ

na kar sakegā vahāñ koī ḳhud-sarī kā ḳhayāl

tujhe rahe na rahe rabt-e-bahami ka KHayal

magar mujhe to hai aadab-e-dosti ka KHayal

taDap raha tha teri bazm-e-naz mein lekin

kisi ne bhi na kiya meri bebasi ka KHayal

pahunch sakega wo kis tarah apni manzil tak

jise zara bhi na ho apni kajrawi ka KHayal

mujhe yaqin hai pa lega manzilon ke nishan

wo karwan ki na ho jis ko gumrahi ka KHayal

milo to dost bano warna sazishen hi karo

ki dosti mein na shamil ho dushmani ka KHayal

rah-e-hayat mein hum to abhi hain nau-amoz

KHuda kare ki na paida ho rahbari ka KHayal

'kamal' jaise jahan honge chand ahl-e-junun

na kar sakega wahan koi KHud-sari ka KHayal