tujhe ye kaise bataun azab kitne the

tujhe ye kaise batā.ūñ 'azāb kitne the

mirī nazar ke muqābil sarāb kitne the

ye hashr meñ mire ā'māl hī batā.eñge

gunāh kitne the mere savāb kitne the

tujhe ḳhabar hī kahāñ hai ki in añdheroñ meñ

hatheliyoñ pe mirī āftāb kitne the

lahū-lahū thā badan maiñ hisāb kyā rakhtā

chaman meñ ḳhaar the kitne gulāb kitne the

shikasta-pā.ī mirā hāsil-e-safar to batā

maiñ jab chalā thā to āñkhoñ meñ ḳhvāb kitne the

maiñ ek jugnū ki tārīkiyoñ se laḌtā huā

tumhāre ruḳh pe magar āftāb kitne the

huzūr apnī taraf bhī zarā nigāh kareñ

ki 'aib aap meñ ‘ālī-janāb kitne the

mile jo log 'nafas' mujh ko bā-ḳhulūs mile

maiñ kyā kahūñ ki ab un meñ ḳharāb kitne the

tujhe ye kaise bataun 'azab kitne the

meri nazar ke muqabil sarab kitne the

ye hashr mein mere aa'mal hi bataenge

gunah kitne the mere sawab kitne the

tujhe KHabar hi kahan hai ki in andheron mein

hatheliyon pe meri aaftab kitne the

lahu-lahu tha badan main hisab kya rakhta

chaman mein KHar the kitne gulab kitne the

shikasta-pai mera hasil-e-safar to bata

main jab chala tha to aankhon mein KHwab kitne the

main ek jugnu ki tarikiyon se laDta hua

tumhaare ruKH pe magar aaftab kitne the

huzur apni taraf bhi zara nigah karen

ki 'aib aap mein ‘ali-janab kitne the

mile jo log 'nafas' mujh ko ba-KHulus mile

main kya kahun ki ab un mein KHarab kitne the