Tuk to KHamosh rakho munh mein zaban sunte ho

Tuk to ḳhāmosh rakho muñh meñ zabāñ sunte ho

apnī hī kahte ho merī bhī miyāñ sunte ho

sañg ko aab kareñ pal meñ hamārī bāteñ

lekin afsos yahī hai ki kahāñ sunte ho

ḳhushk o tar phūñktī phirtī hai sadā ātish-e-ishq

bachiyo is aañch se ai piir o javāñ sunte ho

dam-qadam tak thī hamāre hī junūñ kī raunaq

ab bhī kūchoñ meñ kahīñ shor-o-fuġhāñ sunte ho

maiñ kahā ḳhalq tumhārī jo kamar kahtī hai

tum bhī is kā kahīñ kuchh zikr-o-bayāñ sunte ho

hañs ke yuuñ kahne lagā ḳhair agar hai ye baat

huegī vaisī hī jaisī ki vahāñ sunte ho

hazrat-e-'dard' kī ḳhidmat meñ jab aa 'qā.em' ne

arz ki ye ki ai ustād-e-zamāñ sunte ho

amr hove to 'hidāyat' ko karūñ maiñ sīdhā

vaañ se irshād huā ye ki miyāñ sunte ho

raast hote haiñ kisī se bhī kabhū kaj-tīnat

tiir bantī hai kahīñ shāḳh-e-kamāñ sunte ho

Tuk to KHamosh rakho munh mein zaban sunte ho

apni hi kahte ho meri bhi miyan sunte ho

sang ko aab karen pal mein hamari baaten

lekin afsos yahi hai ki kahan sunte ho

KHushk o tar phunkti phirti hai sada aatish-e-ishq

bachiyo is aanch se ai pir o jawan sunte ho

dam-qadam tak thi hamare hi junun ki raunaq

ab bhi kuchon mein kahin shor-o-fughan sunte ho

main kaha KHalq tumhaari jo kamar kahti hai

tum bhi is ka kahin kuchh zikr-o-bayan sunte ho

hans ke yun kahne laga KHair agar hai ye baat

huegi waisi hi jaisi ki wahan sunte ho

hazrat-e-'dard' ki KHidmat mein jab aa 'qaem' ne

arz ki ye ki ai ustad-e-zaman sunte ho

amr howe to 'hidayat' ko karun main sidha

wan se irshad hua ye ki miyan sunte ho

rast hote hain kisi se bhi kabhu kaj-tinat

tir banti hai kahin shaKH-e-kaman sunte ho