tulu-e-mehr ne phulon ki zindagi kam ki

tulū-e-mehr ne phūloñ kī zindagī kam kī

ye kyā ḳhushī hai ki taqdīr khul ga.ī ġham kī

jalāo ḳhuun ruḳh-e-sham.a zard hai yaaro

lagāo aag ki nikhre to aabrū ġham kī

laboñ tak aa.ī huī muskurāhaToñ ko na rok

tirī balā se jo baḌh jaa.e zindagī ġham kī

na kar yaqīn ki bedār haiñ chaman vaale

bhare chaman meñ luTī hai bahār shabnam kī

jinheñ shu.ūr-e-ġham-dost raas aatā hai

huzūr-e-dost bhī karte haiñ aarzū ġham kī

mirī taraf se bhī us dar pe ek sajda-e-shauq

jahāñ ḳhushī ke barābar ho aabrū ġham kī

jafā-shi.ār duā de mire tabassum ko

hazār baar baḌhā dī hai aabrū ġham kī

guzar chukā huuñ har ik zindagī se maiñ 'anjum'

mirā kalām hai tārīḳh saare aalam kī

tulu-e-mehr ne phulon ki zindagi kam ki

ye kya KHushi hai ki taqdir khul gai gham ki

jalao KHun ruKH-e-shama zard hai yaro

lagao aag ki nikhre to aabru gham ki

labon tak aai hui muskurahaTon ko na rok

teri bala se jo baDh jae zindagi gham ki

na kar yaqin ki bedar hain chaman wale

bhare chaman mein luTi hai bahaar shabnam ki

jinhen shuur-e-gham-dost ras aata hai

huzur-e-dost bhi karte hain aarzu gham ki

meri taraf se bhi us dar pe ek sajda-e-shauq

jahan KHushi ke barabar ho aabru gham ki

jafa-shiar dua de mere tabassum ko

hazar bar baDha di hai aabru gham ki

guzar chuka hun har ek zindagi se main 'anjum'

mera kalam hai tariKH sare aalam ki