tum aa gae jo yahan raat ke andhere mein

tum aa ga.e jo yahāñ raat ke añdhere meñ

haiñ chāñdnī kā samāñ raat ke añdhere meñ

tumheñ hai shauq bahut titliyāñ pakaḌne kā

phiro na yuuñ mirī jaañ raat ke añdhere meñ

bhaTaktī phirtī haiñ rūheñ añdherī rātoñ meñ

nikal paḌe ho kahāñ raat ke añdhere meñ

tumhārī yaad ne dilkash banā diyā varna

ye dilkashī thī kahāñ raat ke añdhere meñ

yahāñ to din ke ujāle meñ log Darte haiñ

kahāñ chale ho miyāñ raat ke añdhere meñ

mirā harīf muḳhātib hai mujh se yuuñ jaise

sadā-e-shor-e-sagāñ raat ke añdhere meñ

jab aa ga.ī hai tabī.at to fikr kyā vaa.iz

milegā kaun yahāñ raat ke añdhere meñ

ye kis ḳhayāl meñ ghar se nikal paḌe ho 'ġhanī'

sukūñ milegā kahāñ raat ke añdhere meñ

tum aa gae jo yahan raat ke andhere mein

hain chandni ka saman raat ke andhere mein

tumhein hai shauq bahut titliyan pakaDne ka

phiro na yun meri jaan raat ke andhere mein

bhaTakti phirti hain ruhen andheri raaton mein

nikal paDe ho kahan raat ke andhere mein

tumhaari yaad ne dilkash bana diya warna

ye dilkashi thi kahan raat ke andhere mein

yahan to din ke ujale mein log Darte hain

kahan chale ho miyan raat ke andhere mein

mera harif muKHatib hai mujh se yun jaise

sada-e-shor-e-sagan raat ke andhere mein

jab aa gai hai tabiat to fikr kya waiz

milega kaun yahan raat ke andhere mein

ye kis KHayal mein ghar se nikal paDe ho 'ghani'

sukun milega kahan raat ke andhere mein