tum aae nahin to hum apni mahfil ko saja kar kya karte

tum aa.e nahīñ to ham apnī mahfil ko sajā kar kyā karte

raunaq tum hī the mahfil kī auroñ ko bulā kar kyā karte

ġhā.eb the nazar se sāhil bhī aur TuuT chukī thī kashtī bhī

aise meñ abas ham tūfāñ se kashtī ko bachā kar kyā karte

apnī hī zamīñ ke jab kitne asrār abhī bhī haiñ pinhāñ

ai logo batāo to itnā ham chāñd pe jā kar kyā karte

the apne parā.e sab dushman aur luuT rahe bhī the mil kar

aise meñ bulāte ham kis ko aur shor machā kar kyā karte

paiġhām to un kā aayā hai tum shahr meñ 'tishna' aa jaao

sahrā hai pasandīda ham ko ham shahr meñ jā kar kyā karte

tum aae nahin to hum apni mahfil ko saja kar kya karte

raunaq tum hi the mahfil ki auron ko bula kar kya karte

ghaeb the nazar se sahil bhi aur TuT chuki thi kashti bhi

aise mein abas hum tufan se kashti ko bacha kar kya karte

apni hi zamin ke jab kitne asrar abhi bhi hain pinhan

ai logo batao to itna hum chand pe ja kar kya karte

the apne parae sab dushman aur luT rahe bhi the mil kar

aise mein bulate hum kis ko aur shor macha kar kya karte

paigham to un ka aaya hai tum shahr mein 'tishna' aa jao

sahra hai pasandida hum ko hum shahr mein ja kar kya karte