تم آئے نہیں تو ہم اپنی محفل کو سجا کر کیا کرتے

تم آئے نہیں تو ہم اپنی محفل کو سجا کر کیا کرتے

رونق تم ہی تھے محفل کی اوروں کو بلا کر کیا کرتے

غائب تھے نظر سے ساحل بھی اور ٹوٹ چکی تھی کشتی بھی

ایسے میں عبث ہم طوفاں سے کشتی کو بچا کر کیا کرتے

اپنی ہی زمیں کے جب کتنے اسرار ابھی بھی ہیں پنہاں

اے لوگو بتاؤ تو اتنا ہم چاند پہ جا کر کیا کرتے

تھے اپنے پرائے سب دشمن اور لوٹ رہے بھی تھے مل کر

ایسے میں بلاتے ہم کس کو اور شور مچا کر کیا کرتے

پیغام تو ان کا آیا ہے تم شہر میں تشنہؔ آ جاؤ

صحرا ہے پسندیدہ ہم کو ہم شہر میں جا کر کیا کرتے