tum apni yaadon ki kahkashan se saja hua aasman ban kar

tum apnī yādoñ kī kahkashāñ se sajā huā āsmān ban kar

mire tasavvur pe chhā bhī jaao mohabbatoñ kā jahān ban kar

ghaTā.eñ bādal ye chāñd taare hasīn qudrat ke sab nazāre

chaman meñ titlī gagan meñ panchhī uḌe haiñ fitrat kī shaan ban kar

agarche tūfān sar uThā.e zamāna yuuñ hī hameñ satā.e

hamārī jur.at rahe salāmat khaḌe haiñ ham to chaTān ban kar

hamīñ ne sīñchā hai is chaman ko hamīñ se urdu kā bāñkpan hai

hamāre ḳhūn-e-jigar kī ḳhushbū mahak rahī hai zabān ban kar

fazā meñ naġhme mohabbatoñ ke zamīñ pe charche sadāqatoñ ke

kareñge māhaul aisā barpā ham amn ke tarjumān ban kar

yazīdī bai'at kā zikr chhoḌo husainī fitrat se naata joḌo

tumhīñ rahoge hamesha zinda jahāñ meñ haq kā nishān ban kar

ajab zamāna thā vo zamāna ajab hai un kā hasīñ fasāna

vo jin ke chehroñ se nuur barse raheñ jo sab kī amaan ban kar

hai maañ ke āñchal kī ThanDī chhāñv to kyoñ na apnī thakan miTā.ūñ

vo merī hastī ke garm sahrā pe rahtī hai sā.ebān ban kar

'shajī.a' ulfat ke giit gaao rah-e-talab meñ ye jaañ luTāo

rahoge zinda hikāyatoñ meñ vafā kī tum dāstāñ ban kar

tum apni yaadon ki kahkashan se saja hua aasman ban kar

mere tasawwur pe chha bhi jao mohabbaton ka jahan ban kar

ghaTaen baadal ye chand tare hasin qudrat ke sab nazare

chaman mein titli gagan mein panchhi uDe hain fitrat ki shan ban kar

agarche tufan sar uThae zamana yun hi hamein satae

hamari jurat rahe salamat khaDe hain hum to chaTan ban kar

hamin ne sincha hai is chaman ko hamin se urdu ka bankpan hai

hamare KHun-e-jigar ki KHushbu mahak rahi hai zaban ban kar

faza mein naghme mohabbaton ke zamin pe charche sadaqaton ke

karenge mahaul aisa barpa hum amn ke tarjuman ban kar

yazidi bai'at ka zikr chhoDo husaini fitrat se nata joDo

tumhin rahoge hamesha zinda jahan mein haq ka nishan ban kar

ajab zamana tha wo zamana ajab hai un ka hasin fasana

wo jin ke chehron se nur barse rahen jo sab ki aman ban kar

hai man ke aanchal ki ThanDi chhanw to kyon na apni thakan miTaun

wo meri hasti ke garm sahra pe rahti hai saeban ban kar

'shajia' ulfat ke git gao rah-e-talab mein ye jaan luTao

rahoge zinda hikayaton mein wafa ki tum dastan ban kar