تم اپنی یادوں کی کہکشاں سے سجا ہوا آسمان بن کر

تم اپنی یادوں کی کہکشاں سے سجا ہوا آسمان بن کر

مرے تصور پہ چھا بھی جاؤ محبتوں کا جہان بن کر

گھٹائیں بادل یہ چاند تارے حسین قدرت کے سب نظارے

چمن میں تتلی گگن میں پنچھی اڑے ہیں فطرت کی شان بن کر

اگرچہ طوفان سر اٹھائے زمانہ یوں ہی ہمیں ستائے

ہماری جرأت رہے سلامت کھڑے ہیں ہم تو چٹان بن کر

ہمیں نے سینچا ہے اس چمن کو ہمیں سے اردو کا بانکپن ہے

ہمارے خون جگر کی خوشبو مہک رہی ہے زبان بن کر

فضا میں نغمے محبتوں کے زمیں پہ چرچے صداقتوں کے

کریں گے ماحول ایسا برپا ہم امن کے ترجمان بن کر

یزیدی بیعت کا ذکر چھوڑو حسینی فطرت سے ناطہ جوڑو

تمہیں رہو گے ہمیشہ زندہ جہاں میں حق کا نشان بن کر

عجب زمانہ تھا وہ زمانہ عجب ہے ان کا حسیں فسانہ

وہ جن کے چہروں سے نور برسے رہیں جو سب کی امان بن کر

ہے ماں کے آنچل کی ٹھنڈی چھاؤں تو کیوں نہ اپنی تھکن مٹاؤں

وہ میری ہستی کے گرم صحرا پہ رہتی ہے سائبان بن کر

شجیعؔ الفت کے گیت گاؤ رہ طلب میں یہ جاں لٹاؤ

رہو گے زندہ حکایتوں میں وفا کی تم داستاں بن کر