tum baat karo us se jo ho baat ke qabil

tum baat karo us se jo ho baat ke qābil

ham baat ke qābil na mulāqāt ke qābil

allāh kī qudrat hai kahāñ ġhair kahāñ ham

chaḌhtī haiñ vo muñh par jo na thī baat ke qābil

kah do mirī turbat meñ nakīrain na aa.eñ

hotā nahīñ dīvāna mulāqāt ke qābil

kyā zikr-e-ruḳh-e-yār karūñ tiira diloñ se

din kī ye kahānī hai nahīñ raat ke qābil

zebā hai mirā ḳhāna-e-dil ho jo ghar us kā

ye kā'ba hai us qibla-e-hājāt ke qābil

sharm aa.ī hai har chand ki hai naqd-e-ḳhirad paas

ye nazr nahīñ pīr-e-ḳharābāt ke qābil

ḳhāmosh rahe ham jo ga.e dair-o-haram meñ

donoñ nazar aa.e na munājāt ke qābil

hairat se hai sab barm-e-muraqqā tire aage

kis kā hai dahan harf-o-hikāyāt ke qābil

tū hamd ke qābil hai zarā shak nahīñ is meñ

lekin hai kahāñ hamd tirī zaat ke qābil

muñh moḌ ga.ī teġh tirī iid ke din bhī

shāyad mujhe samjhī na mulāqāt ke qābil

itnā bhī kaleja nahīñ ġham ko jo ḳhilā.uñ

taqdīr ne rakkhā na mudārāt ke qābil

ta.amīr jo ka.abe kī huī nāf-e-zamīñ meñ

shāyad ye zamīñ thī na ḳharābāt ke qābil

laa.eq nahīñ jo baat ke haiñ ham-suḳhan us se

ḳhāmosh vo baiThe haiñ jo haiñ baat ke qābil

karte haiñ jo vo faḳhr do abrū pe bajā hai

haqqā ki ye matl.a hai mabāhāt ke qābil

ġhunche ko hai bejā dahan-e-yār se da.avā

chhoTā sā dahan kab hai baḌī baat ke qābil

ham mahfil-e-jānāñ meñ 'asīr' aap hī chup haiñ

bāteñ vo banā.eñ ki jo hoñ baat ke qābil

tum baat karo us se jo ho baat ke qabil

hum baat ke qabil na mulaqat ke qabil

allah ki qudrat hai kahan ghair kahan hum

chaDhti hain wo munh par jo na thi baat ke qabil

kah do meri turbat mein nakirain na aaen

hota nahin diwana mulaqat ke qabil

kya zikr-e-ruKH-e-yar karun tera dilon se

din ki ye kahani hai nahin raat ke qabil

zeba hai mera KHana-e-dil ho jo ghar us ka

ye ka'ba hai us qibla-e-hajat ke qabil

sharm aai hai har chand ki hai naqd-e-KHirad pas

ye nazr nahin pir-e-KHarabaat ke qabil

KHamosh rahe hum jo gae dair-o-haram mein

donon nazar aae na munajat ke qabil

hairat se hai sab barm-e-muraqqa tere aage

kis ka hai dahan harf-o-hikayat ke qabil

tu hamd ke qabil hai zara shak nahin is mein

lekin hai kahan hamd teri zat ke qabil

munh moD gai tegh teri id ke din bhi

shayad mujhe samjhi na mulaqat ke qabil

itna bhi kaleja nahin gham ko jo KHilaun

taqdir ne rakkha na mudaraat ke qabil

tamir jo kabe ki hui naf-e-zamin mein

shayad ye zamin thi na KHarabaat ke qabil

laeq nahin jo baat ke hain ham-suKHan us se

KHamosh wo baiThe hain jo hain baat ke qabil

karte hain jo wo faKHr do abru pe baja hai

haqqa ki ye matla hai mabahat ke qabil

ghunche ko hai beja dahan-e-yar se dawa

chhoTa sa dahan kab hai baDi baat ke qabil

hum mahfil-e-jaanan mein 'asir' aap hi chup hain

baaten wo banaen ki jo hon baat ke qabil