tum chale aao to zauq-e-gham-e-hijran bhi nahin

tum chale aao to zauq-e-ġham-e-hijrāñ bhī nahīñ

jaan dene kā kuchh aisā mujhe armāñ bhī nahīñ

dekhtā hai ki koī baat kā pursāñ bhī nahīñ

tire bīmār ko ab ḳhvāhish-e-darmāñ bhī nahīñ

mirī vahshat ke asar se thā zamāna vīrāñ

maiñ bayābāñ meñ nahīñ huuñ to bayābāñ bhī nahīñ

bā.is-e-qatl huā hāl-e-zabūn-e-bismil

ye agar sach hai to phir aap kā ehsāñ bhī nahīñ

merā marnā bhī hai mauqūf irādoñ pe tire

jis ko āsān samajhtā huuñ vo āsāñ bhī nahīñ

tere paikān-e-sitam kā huā maqsad hāsil

zaḳhm dil meñ hai mire aur numāyāñ bhī nahīñ

ham-navā soch meñ haiñ baaġh hai suunā suunā

maiñ qafas meñ huuñ to vo rang-e-gulistāñ bhī nahīñ

dil-e-gum-gashta se milne kī tamanna hai 'shamīm'

ye vo ḳhvāhish hai ki jis kā koī imkāñ bhī nahīñ

tum chale aao to zauq-e-gham-e-hijran bhi nahin

jaan dene ka kuchh aisa mujhe arman bhi nahin

dekhta hai ki koi baat ka pursan bhi nahin

tere bimar ko ab KHwahish-e-darman bhi nahin

meri wahshat ke asar se tha zamana viran

main bayaban mein nahin hun to bayaban bhi nahin

bais-e-qatl hua haal-e-zabun-e-bismil

ye agar sach hai to phir aap ka ehsan bhi nahin

mera marna bhi hai mauquf iradon pe tere

jis ko aasan samajhta hun wo aasan bhi nahin

tere paikan-e-sitam ka hua maqsad hasil

zaKHm dil mein hai mere aur numayan bhi nahin

ham-nawa soch mein hain bagh hai suna suna

main qafas mein hun to wo rang-e-gulistan bhi nahin

dil-e-gum-gashta se milne ki tamanna hai 'shamim'

ye wo KHwahish hai ki jis ka koi imkan bhi nahin