tum ghalat samjhe hamein aur pareshani hai

tum ġhalat samjhe hameñ aur pareshānī hai

ye to āsānī hai jo be-sar-o-sāmānī hai

ḳhvāhish-e-dīd sar-e-vasl jo niklī nahīñ thī

lamha-e-hijr meñ tajrīd kī uryānī hai

kyuuñ bhalā bojh uThā.ūñ maiñ tire ḳhvāboñ kā

mere ā.īne meñ kyā kam koī hairānī hai

ek muddat se jo baiThī hai mirī palkoñ par

ḳhāna-e-dil meñ vo sūrat abhī anjānī hai

Duub jaatā hai sar-e-shām hamārā dil bhī

ye bhī sūraj kī tarah raat kā zindānī hai

ḳhud ko ham bech ke ik ḳhvāb to le paa.e nahīñ

tere bāzār meñ kis chiiz kī arzānī hai

kis bharose pe maiñ Takrā.ūñ havā se 'sajjād'

gar bikhartā huuñ to atrāf meñ sab paanī hai

tum ghalat samjhe hamein aur pareshani hai

ye to aasani hai jo be-sar-o-samani hai

KHwahish-e-did sar-e-wasl jo nikli nahin thi

lamha-e-hijr mein tajrid ki uryani hai

kyun bhala bojh uThaun main tere KHwabon ka

mere aaine mein kya kam koi hairani hai

ek muddat se jo baiThi hai meri palkon par

KHana-e-dil mein wo surat abhi anjaani hai

Dub jata hai sar-e-sham hamara dil bhi

ye bhi suraj ki tarah raat ka zindani hai

KHud ko hum bech ke ek KHwab to le pae nahin

tere bazar mein kis chiz ki arzani hai

kis bharose pe main Takraun hawa se 'sajjad'

gar bikharta hun to atraf mein sab pani hai