tum ghaTa samjhe the jis ko wo koi baadal na tha

tum ghaTā samjhe the jis ko vo koī bādal na thā

thā kaleje kā lahū vo aañkh kā kājal na thā

fāsle kyuuñ ho ga.e itnī mulāqātoñ ke ba.ad

do qadam hī saath chalnā itnā to mushkil na thā

rāt-din kī dāstāñ mujh se ai tanhā.ī na pūchh

dil kabhī bhī us kī yādoñ se magar ġhāfil na thā

jān-e-jāñ ab aap chāhe jo kaheñ mujh ko faqat

aaj kī shab aap se milne kā merā dil na thā

ab to bas bedard lamhe shāmil-e-taqdīr haiñ

vaise merā dil kabhī bhī is qadar ghā.il na thā

phuul kā nazrāna le kar aayā is andāz se

aisā lagtā thā ki jaise vo mirā qātil na thā

mere hoñToñ pe hamesha pyaas ke sahrā rahe

thā ghaTā sā mujh pe lekin TūTtā bādal na thā

chhan-chhanā ke duur tak āvāz gūñjī zor se

TuuT ke bikhrā hai sapnā haañ magar bismil na thā

ishq ne jānāñ ye kyā jaadū sā ham pe kar diyā

dil kabhī bhī is ravayye kī taraf maa.il na thā

kuchh gile shikve shikasta dil se kar lenā kabhī

siskiyoñ se yuuñ bhī 'ra.anā' tum ko kuchh hāsil na thā

tum ghaTa samjhe the jis ko wo koi baadal na tha

tha kaleje ka lahu wo aankh ka kajal na tha

fasle kyun ho gae itni mulaqaton ke baad

do qadam hi sath chalna itna to mushkil na tha

raat-din ki dastan mujh se ai tanhai na puchh

dil kabhi bhi us ki yaadon se magar ghafil na tha

jaan-e-jaan ab aap chahe jo kahen mujh ko faqat

aaj ki shab aap se milne ka mera dil na tha

ab to bas bedard lamhe shamil-e-taqdir hain

waise mera dil kabhi bhi is qadar ghail na tha

phul ka nazrana le kar aaya is andaz se

aisa lagta tha ki jaise wo mera qatil na tha

mere honTon pe hamesha pyas ke sahra rahe

tha ghaTa sa mujh pe lekin TuTta baadal na tha

chhan-chhana ke dur tak aawaz gunji zor se

TuT ke bikhra hai sapna han magar bismil na tha

ishq ne jaanan ye kya jadu sa hum pe kar diya

dil kabhi bhi is rawayye ki taraf mail na tha

kuchh gile shikwe shikasta dil se kar lena kabhi

siskiyon se yun bhi 'rana' tum ko kuchh hasil na tha