tum gulistan se gae ho to gulistan chup hai

tum gulistāñ se ga.e ho to gulistāñ chup hai

shāḳh-e-gul khoī huī murġh-e-ḳhush-ilhāñ chup hai

ufuq-e-dil pe dikhā.ī nahīñ detī hai dhanak

ġham-zada mausam-e-gul abr-e-bahārāñ chup hai

ālam-e-tishnagī-e-bāda-gusārāñ mat pūchh

mai-kada duur hai mīnā-e-zar-e-afshāñ chup hai

aur aage na baḌhā qissa-e-dil qissa-e-ġham

dhaḌkaneñ chup haiñ sarishk-e-sar-e-mizhgāñ chup hai

shahr meñ ek qayāmat thī qayāmat na rahī

hashr ḳhāmosh huā fitna-e-daurāñ chup hai

na kisī aah kī āvāz na zanjīr kā shor

aaj kyā ho gayā zindāñ meñ ki zindāñ chup hai

tum gulistan se gae ho to gulistan chup hai

shaKH-e-gul khoi hui murgh-e-KHush-ilhan chup hai

ufuq-e-dil pe dikhai nahin deti hai dhanak

gham-zada mausam-e-gul abr-e-bahaaran chup hai

aalam-e-tishnagi-e-baada-gusaran mat puchh

mai-kada dur hai mina-e-zar-e-afshan chup hai

aur aage na baDha qissa-e-dil qissa-e-gham

dhaDkanen chup hain sarishk-e-sar-e-mizhgan chup hai

shahr mein ek qayamat thi qayamat na rahi

hashr KHamosh hua fitna-e-dauran chup hai

na kisi aah ki aawaz na zanjir ka shor

aaj kya ho gaya zindan mein ki zindan chup hai