tum hi nahin ho mere gham se be-KHabar tanha

tum hī nahīñ ho mire ġham se be-ḳhabar tanhā

jalā hai dil kā diyā raat raat bhar tanhā

haiñ sāmrī ke pujārī hī is nagar ke ḳhudā

mirā nasīb ki maiñ aa gayā idhar tanhā

ye sar pe dhuup ye hadd-e-nigāh tak sahrā

bas ek maiñ huuñ mirā jism hai magar tanhā

rahī aniis mirī nā-murādiyoñ kī thakan

kaTā nahīñ hai mirī ziist kā safar tanhā

ḳhayāl-e-sāya-e-gesū bhī ho sakā na nasīb

kaTī hai merī javānī kī dopahar tanhā

na abrūoñ ke darīche na ḳhāl-o-ḳhad ke chaman

mirā junūñ mujhe pahuñchā gayā kidhar tanhā

ye āftāb-o-kavākib ye kahkashāñ kā hujūm

haiñ saath saath magar sab kā hai safar tanhā

kalām kartī rahī mujh se kā.enāt kī ruuh

kaTī nahīñ hai sitāroñ kī rahguzar tanhā

tulūa hote haiñ mahtāb zehn meñ 'kausar'

ġhurūb hotā hai jab kaukab-e-sahar tanhā

tum hi nahin ho mere gham se be-KHabar tanha

jala hai dil ka diya raat raat bhar tanha

hain samri ke pujari hi is nagar ke KHuda

mera nasib ki main aa gaya idhar tanha

ye sar pe dhup ye hadd-e-nigah tak sahra

bas ek main hun mera jism hai magar tanha

rahi anis meri na-muradiyon ki thakan

kaTa nahin hai meri zist ka safar tanha

KHayal-e-saya-e-gesu bhi ho saka na nasib

kaTi hai meri jawani ki dopahar tanha

na abruon ke dariche na KHal-o-KHad ke chaman

mera junun mujhe pahuncha gaya kidhar tanha

ye aaftab-o-kawakib ye kahkashan ka hujum

hain sath sath magar sab ka hai safar tanha

kalam karti rahi mujh se kaenat ki ruh

kaTi nahin hai sitaron ki rahguzar tanha

tulua hote hain mahtab zehn mein 'kausar'

ghurub hota hai jab kaukab-e-sahar tanha