tum hijr ke jhagDon ko miTa kyon nahin dete

tum hijr ke jhagḌoñ ko miTā kyoñ nahīñ dete

bigḌī huī taqdīr banā kyoñ nahīñ dete

dard-e-dil-e-betāb ghaTā kyoñ nahīñ dete

mahfil se raqīboñ ko uThā kyoñ nahīñ dete

kyoñ hai ḳhafagī kis liye māthe pe shikan hai

taqsīr mirī aap batā kyoñ nahīñ dete

tum se jo kiyā karte haiñ har-vaqt daġhā.eñ

ai hazrat-e-dil un ko duā kyoñ nahīñ dete

majbūr huuñ maiñ kashmakash-e-ranj-o-alam meñ

tum aa ke mirī jaan chhuḌā kyoñ nahīñ dete

tang aa.e haiñ ham-sāya jo fariyād se merī

us shoḳh fusūñ-gar ko bulā kyoñ nahīñ dete

ik bosa-e-ruḳhsār kā muddat se huuñ saa.il

haiñ aap agar ahl-e-saḳhā kyoñ nahīñ dete

vo pūchhte phirte haiñ ki maiñ kis ko miTā.ūñ

turbat ko mirī log batā kyoñ nahīñ dete

martā huuñ maiñ tum par jo kahā un se to bole

ye sach hai to phir mar ke dikhā kyoñ nahīñ dete

vo tazkira-e-sadma-e-hijrāñ pe shab-e-vasl

bole ki use dil se bhulā kyoñ nahīñ dete

jab maiñ ne kahā tum se hasīñ aur bahut haiñ

kis naaz se bole ki dikhā kyoñ nahīñ dete

kyoñ qatl kī pursish pe sar-e-hashr ho ḳhāmosh

ilzām raqīboñ pe lagā kyoñ nahīñ dete

hai 'nashtar'-e-nāshād jhukā.e hue sar ko

tum jauhar-e-shamshīr dikhā kyoñ nahīñ dete

tum hijr ke jhagDon ko miTa kyon nahin dete

bigDi hui taqdir bana kyon nahin dete

dard-e-dil-e-betab ghaTa kyon nahin dete

mahfil se raqibon ko uTha kyon nahin dete

kyon hai KHafagi kis liye mathe pe shikan hai

taqsir meri aap bata kyon nahin dete

tum se jo kiya karte hain har-waqt daghaen

ai hazrat-e-dil un ko dua kyon nahin dete

majbur hun main kashmakash-e-ranj-o-alam mein

tum aa ke meri jaan chhuDa kyon nahin dete

tang aae hain ham-saya jo fariyaad se meri

us shoKH fusun-gar ko bula kyon nahin dete

ek bosa-e-ruKHsar ka muddat se hun sail

hain aap agar ahl-e-saKHa kyon nahin dete

wo puchhte phirte hain ki main kis ko miTaun

turbat ko meri log bata kyon nahin dete

marta hun main tum par jo kaha un se to bole

ye sach hai to phir mar ke dikha kyon nahin dete

wo tazkira-e-sadma-e-hijran pe shab-e-wasl

bole ki use dil se bhula kyon nahin dete

jab main ne kaha tum se hasin aur bahut hain

kis naz se bole ki dikha kyon nahin dete

kyon qatl ki pursish pe sar-e-hashr ho KHamosh

ilzam raqibon pe laga kyon nahin dete

hai 'nashtar'-e-nashad jhukae hue sar ko

tum jauhar-e-shamshir dikha kyon nahin dete