tum ho jab mere liye hain do-jahan mere liye

tum ho jab mere liye haiñ do-jahāñ mere liye

ye zamīñ mere liye ye āsmāñ mere liye

is tarah jazbāt-e-āzādī bahal jā.eñge kyā

ban rahā hai kyuuñ qafas meñ āshiyāñ mere liye

maiñ chalā jā.ūñ na gulshan chhoḌ kar qabl-az-bahār

kyuuñ girīñ saare chaman par bijliyāñ mere liye

ro rahā huuñ aaj maiñ saare jahāñ ke vāste

ro.egā kal dekhnā saarā jahāñ mere liye

iztirāb-e-shauq se kyā kyā huī haiñ laġhzisheñ

iltifāt-e-yār ne jab imtihāñ mere liye

hai mohabbat kab rahīn-e-rāh-o-rasm-e-tāhirī

bandagī hai be-niyāz-e-āstāñ mere liye

be-panāhī hai yahī 'bismil' jo husn-o-ishq kī

hogī nā-kāfī hayāt-e-jāvidāñ mere liye

tum ho jab mere liye hain do-jahan mere liye

ye zamin mere liye ye aasman mere liye

is tarah jazbaat-e-azadi bahal jaenge kya

ban raha hai kyun qafas mein aashiyan mere liye

main chala jaun na gulshan chhoD kar qabl-az-bahaar

kyun girin sare chaman par bijliyan mere liye

ro raha hun aaj main sare jahan ke waste

roega kal dekhna sara jahan mere liye

iztirab-e-shauq se kya kya hui hain laghzishen

iltifat-e-yar ne jab imtihan mere liye

hai mohabbat kab rahin-e-rah-o-rasm-e-tahiri

bandagi hai be-niyaz-e-astan mere liye

be-panahi hai yahi 'bismil' jo husn-o-ishq ki

hogi na-kafi hayat-e-jawidan mere liye