tum ho jahan ke shayad main bhi wahan raha hun

tum ho jahāñ ke shāyad maiñ bhī vahāñ rahā huuñ

kuchh tum bhī bhūlte ho kuchh maiñ bhī bhūltā huuñ

miTtā bhī jā rahā huuñ puurā bhī ho rahā huuñ

maiñ kis kī aarzū huuñ maiñ kis kā mudda.ā huuñ

manzil kī yuuñ to mujh ko koī ḳhabar nahīñ hai

dil meñ kisī taraf ko kuchh sochtā chalā huuñ

letī haiñ ulTī sāñseñ jab shām-e-ġham fazā.eñ

us dam fanā-baqā kī maiñ nabz dekhtā huuñ

huuñ vo shuā-e-fardā jo aañkh mal rahī hai

vo surmagīñ ufuq par maiñ thartharā rahā huuñ

jis se shajar-hajar meñ ik ruuh dauḌ jaa.e

vo sāz-e-sarmadī maiñ ġhazloñ meñ chheḌtā huuñ

tum ho jahan ke shayad main bhi wahan raha hun

kuchh tum bhi bhulte ho kuchh main bhi bhulta hun

miTta bhi ja raha hun pura bhi ho raha hun

main kis ki aarzu hun main kis ka muddaa hun

manzil ki yun to mujh ko koi KHabar nahin hai

dil mein kisi taraf ko kuchh sochta chala hun

leti hain ulTi sansen jab sham-e-gham fazaen

us dam fana-baqa ki main nabz dekhta hun

hun wo shua-e-farda jo aankh mal rahi hai

wo surmagin ufuq par main tharthara raha hun

jis se shajar-hajar mein ek ruh dauD jae

wo saz-e-sarmadi main ghazlon mein chheDta hun