tum ho ya chheDti hai yaad-e-sahar koi to hai

tum ho yā chheḌtī hai yād-e-sahar koī to hai

khaTkhaTātā hai jo ye ḳhvāb kā dar koī to hai

dil pe paḌtī huī duzdīda-nazar koī to hai

jis taraf dekh rahā huuñ maiñ udhar koī to hai

aise nādāñ nahīñ rātoñ meñ bhaTakne vaale

jāgtī āñkhoñ meñ ḳhurshīd-e-sahar koī to hai

ḳhud-baḳhud haath garebāñ kī taraf uThte haiñ

sarsarātī sī havāoñ meñ ḳhabar koī to hai

kis kā muñh dekh rahī hai safar-āmāda hayāt

sū-e-maqtal hī sahī rāhguzar koī to hai

tū mujhe dekh mire paañv ke chhāloñ pe na jā

zindagī tere liye ḳhāk-basar koī to hai

din kaTā saarā ḳharāboñ meñ bhaTakte 'aḳhtar'

shaam hotī hai chalo ḳhair se ghar koī to hai

tum ho ya chheDti hai yaad-e-sahar koi to hai

khaTkhaTata hai jo ye KHwab ka dar koi to hai

dil pe paDti hui duzdida-nazar koi to hai

jis taraf dekh raha hun main udhar koi to hai

aise nadan nahin raaton mein bhaTakne wale

jagti aankhon mein KHurshid-e-sahar koi to hai

KHud-baKHud hath gareban ki taraf uThte hain

sarsaraati si hawaon mein KHabar koi to hai

kis ka munh dekh rahi hai safar-amada hayat

su-e-maqtal hi sahi rahguzar koi to hai

tu mujhe dekh mere panw ke chhaalon pe na ja

zindagi tere liye KHak-basar koi to hai

din kaTa sara KHarabon mein bhaTakte 'aKHtar'

sham hoti hai chalo KHair se ghar koi to hai