tum ek aise shaKHs ko pahchante ho ya nahin

tum ik aise shaḳhs ko pahchānte ho yā nahīñ

jis kā chehra boltā hai aur lab goyā nahīñ

sub.h ko dekhā to do ghaav mire chehre pe the

raat kuchh rone kī ḳhvāhish thī magar royā nahīñ

phailtā jaatā hai ḳhud-rav sabza-e-ġham chār-sū

khet vo kāTūñgā jo maiñ ne kabhī boyā nahīñ

ḳhvāb dekhā thā koī bachpan kī kachchī niiñd meñ

dosto phir chain se maiñ aaj tak soyā nahīñ

zīnat-e-malbūs-e-hastī baḌh ga.ī jis daaġh se

zindagī bhar maiñ ne aise daaġh ko dhoyā nahīñ

tum ek aise shaKHs ko pahchante ho ya nahin

jis ka chehra bolta hai aur lab goya nahin

subh ko dekha to do ghaw mere chehre pe the

raat kuchh rone ki KHwahish thi magar roya nahin

phailta jata hai KHud-raw sabza-e-gham chaar-su

khet wo kaTunga jo main ne kabhi boya nahin

KHwab dekha tha koi bachpan ki kachchi nind mein

dosto phir chain se main aaj tak soya nahin

zinat-e-malbus-e-hasti baDh gai jis dagh se

zindagi bhar main ne aise dagh ko dhoya nahin