tum jinhen dil mein liye phirte ho jazbon ki tarah

tum jinheñ dil meñ liye phirte ho jazboñ kī tarah

zarb-e-lafzī se bikhar jā.eñge shīshoñ kī tarah

us ne va.ade jo kiye the kabhī qasmoñ kī tarah

dil pe tahrīr haiñ hāthoñ kī lakīroñ kī tarah

maiñ ki azmat meñ farishtoñ se ziyāda huuñ magar

chāhtā ye huuñ nazar aa.uuñ farishtoñ kī tarah

saañs ke saath ghuTe jaate haiñ rūhoñ ke libās

ham bhī tahlīl hue jaate haiñ lamhoñ kī tarah

ye ghaTā.eñ ye siyah raat ye kājal ye nasīb

in meñ koī bhī nahīñ hai tirī zulfoñ kī tarah

koī dhaḌkan yā harārat yā koī aañsū ho

yuuñ to patthar bhī nazar aate haiñ jismoñ kī tarah

intizār aur kisī sho.ala-badan kā 'aḳhtar'

merī āñkheñ mujhe lagne lagīñ chhāloñ kī tarah

tum jinhen dil mein liye phirte ho jazbon ki tarah

zarb-e-lafzi se bikhar jaenge shishon ki tarah

us ne wade jo kiye the kabhi qasmon ki tarah

dil pe tahrir hain hathon ki lakiron ki tarah

main ki azmat mein farishton se ziyaada hun magar

chahta ye hun nazar aaun farishton ki tarah

sans ke sath ghuTe jate hain ruhon ke libas

hum bhi tahlil hue jate hain lamhon ki tarah

ye ghaTaen ye siyah raat ye kajal ye nasib

in mein koi bhi nahin hai teri zulfon ki tarah

koi dhaDkan ya hararat ya koi aansu ho

yun to patthar bhi nazar aate hain jismon ki tarah

intizar aur kisi shoala-badan ka 'aKHtar'

meri aankhen mujhe lagne lagin chhaalon ki tarah