tum jise kahte ho KHaslat mujhe le Dubegi

tum jise kahte ho ḳhaslat mujhe le Dūbegī

sab ko ḳhush rakhne kī hasrat mujhe le Dūbegī

har ghaḌī terī zarūrat mujhe le Dūbegī

terī itnī ye 'ināyat mujhe le Dūbegī

tanhā mujh ko to kabhī chhoḌ mire hamdam tū

terī har lamhe kī 'ādat mujhe le Dūbegī

mashvara terā tujhe bhuul maiñ jā.ūñ lekin

terī yādoñ se ye mohlat mujhe le Dūbegī

dariyā huuñ maiñ mirī fitrat hai musalsal bahnā

terī chāhat kī ye shiddat mujhe le Dūbegī

shahr meñ tere mohabbat bhī bikā kartī hai

dil meñ paivast ye ulfat mujhe le Dūbegī

ab chalan dekh ke duniyā kā yahī samjhā huuñ

daur-e-hāzir meñ sharāfat mujhe le Dūbegī

tum jise kahte ho KHaslat mujhe le Dubegi

sab ko KHush rakhne ki hasrat mujhe le Dubegi

har ghaDi teri zarurat mujhe le Dubegi

teri itni ye 'inayat mujhe le Dubegi

tanha mujh ko to kabhi chhoD mere hamdam tu

teri har lamhe ki 'adat mujhe le Dubegi

mashwara tera tujhe bhul main jaun lekin

teri yaadon se ye mohlat mujhe le Dubegi

dariya hun main meri fitrat hai musalsal bahna

teri chahat ki ye shiddat mujhe le Dubegi

shahr mein tere mohabbat bhi bika karti hai

dil mein paiwast ye ulfat mujhe le Dubegi

ab chalan dekh ke duniya ka yahi samjha hun

daur-e-hazir mein sharafat mujhe le Dubegi