تم جو ہر وقت مجھ میں حاضر ہو

تم جو ہر وقت مجھ میں حاضر ہو

معجزہ ہو کوئی یا ساحر ہو

کاش خوابوں سے تم نکل آؤ

اور مجسم مرے بظاہر ہو

بات کھل کے کرو جو دل میں ہے

مدعا تاکہ کھل کے ظاہر ہو

میری روداد زندگی میں بس

تم ہی اول ہو تم ہی آخر ہو

ایسا کچھ خاص چاہئے تم میں

صرف خالص جو میری خاطر ہو

تذکرہ کرتے ہو رقیبوں کا

دل جلانے میں کافی ماہر ہو

دل دکھا کر بھی دل پہ قابض ہو

سادہ ہو یا بڑے ہی شاطر ہو

آدمی موت سے نہیں ڈرتا

خود ہی گر قبر کا مجاور ہو

چین ممکن نہیں تمہیں آئے

تم میاں اس جہاں کے شاعر ہو