tum jo har waqt mujh mein hazir ho

tum jo har vaqt mujh meñ hāzir ho

mo'jiza ho koī yā sāhir ho

kaash ḳhvāboñ se tum nikal aao

aur mujassam mire bazāhir ho

baat khul ke karo jo dil meñ hai

mudda'ā taaki khul ke zāhir ho

merī rūdād-e-zindagī meñ bas

tum hī avval ho tum hī āḳhir ho

aisā kuchh ḳhaas chāhiye tum meñ

sirf ḳhālis jo merī ḳhātir ho

tazkira karte ho raqīboñ kā

dil jalāne meñ kaafī māhir ho

dil dukhā kar bhī dil pe qābiz ho

saada ho yā baḌe hī shātir ho

aadmī maut se nahīñ Dartā

ḳhud hī gar qabr kā mujāvir ho

chain mumkin nahīñ tumheñ aa.e

tum miyāñ is jahāñ ke shā'ir ho

tum jo har waqt mujh mein hazir ho

mo'jiza ho koi ya sahir ho

kash KHwabon se tum nikal aao

aur mujassam mere bazahir ho

baat khul ke karo jo dil mein hai

mudda'a taki khul ke zahir ho

meri rudad-e-zindagi mein bas

tum hi awwal ho tum hi aaKHir ho

aisa kuchh KHas chahiye tum mein

sirf KHalis jo meri KHatir ho

tazkira karte ho raqibon ka

dil jalane mein kafi mahir ho

dil dukha kar bhi dil pe qabiz ho

sada ho ya baDe hi shatir ho

aadmi maut se nahin Darta

KHud hi gar qabr ka mujawir ho

chain mumkin nahin tumhein aae

tum miyan is jahan ke sha'ir ho