tum jo jite ho kai bar na jaane kaise

tum jo jiite ho ka.ī baar na jaane kaise

ab agar haar ga.e ho to bahāne kaise

ham ne dekhā nahīñ muḌ kar kabhī maazī kī taraf

ham se mat pūchh ki guzre haiñ zamāne kaise

maiñ ne jalte hue manzar to nahīñ dekhe the

raakh kā Dher hue ḳhvāb suhāne kaise

ijtihād un ke 'amal kī rahī buniyād agar

ho ga.e aise baḌe log purāne kaise

pahle ham niiñd se uTTheñ to uThā.eñ ye savāl

ḳhud jo so.e haiñ chale aa.e jagāne kaise

chaliye tauhīd-parastoñ ko samajh aa hī gayā

vaqt ke saath badalte haiñ Thikāne kaise

jis meñ aane pe na jaane pe koī qudrat hai

aisī mahfil meñ sunā.ūñ maiñ tarāne kaise

khilte haiñ bāġh-e-ḳhirad meñ ye matānat ke gul

jo haiñ bechain tabī'at vo siyāne kaise

bastiyāñ roz ġharīboñ kī ujaḌtī haiñ jahāñ

gūñjte haiñ vahāñ rah rah ke tarāne kaise

baat 'rāhib' ye zarā sī na samajh paa.e tum

rū-barū us ke chaleñge ye bahāne kaise

tum jo jite ho kai bar na jaane kaise

ab agar haar gae ho to bahane kaise

hum ne dekha nahin muD kar kabhi mazi ki taraf

hum se mat puchh ki guzre hain zamane kaise

main ne jalte hue manzar to nahin dekhe the

rakh ka Dher hue KHwab suhane kaise

ijtihad un ke 'amal ki rahi buniyaad agar

ho gae aise baDe log purane kaise

pahle hum nind se uTThen to uThaen ye sawal

KHud jo soe hain chale aae jagane kaise

chaliye tauhid-paraston ko samajh aa hi gaya

waqt ke sath badalte hain Thikane kaise

jis mein aane pe na jaane pe koi qudrat hai

aisi mahfil mein sunaun main tarane kaise

khilte hain bagh-e-KHirad mein ye matanat ke gul

jo hain bechain tabi'at wo siyane kaise

bastiyan roz gharibon ki ujaDti hain jahan

gunjte hain wahan rah rah ke tarane kaise

baat 'rahib' ye zara si na samajh pae tum

ru-baru us ke chalenge ye bahane kaise