tumko agar hamari mohabbat nahin rahi

tum ko agar hamārī mohabbat nahīñ rahī

ham ko bhī ab adū se adāvat nahīñ rahī

har ik adā pe marne kī aadat nahīñ rahī

vo dil nahīñ rahā vo tabī.at nahīñ rahī

mazmūn-e-mudda.ā abhī dil meñ hī thā mire

kahte haiñ ab to tāb-e-samā.at nahīñ rahī

vaañ hai vahī vufūr-e-itāb-o-jafā-o-qahr

yaañ naaz bhī uThāne kī tāqat nahīñ rahī

be-shak naqāb-e-ruḳh se uThāyā kisī ne aaj

zulmat-kade meñ mere jo zulmat nahīñ rahī

'mushtāq' tere ishq kī hai dhuum āj-kal

ab qais-o-kohkan kī vo shohrat nahīñ rahī

tum ko agar hamari mohabbat nahin rahi

hum ko bhi ab adu se adawat nahin rahi

har ek ada pe marne ki aadat nahin rahi

wo dil nahin raha wo tabiat nahin rahi

mazmun-e-muddaa abhi dil mein hi tha mere

kahte hain ab to tab-e-samaat nahin rahi

wan hai wahi wufur-e-itab-o-jafa-o-qahr

yan naz bhi uThane ki taqat nahin rahi

be-shak naqab-e-ruKH se uThaya kisi ne aaj

zulmat-kade mein mere jo zulmat nahin rahi

'mushtaq' tere ishq ki hai dhum aaj-kal

ab qais-o-kohkan ki wo shohrat nahin rahi