tumko apni nazar bahut kuchh hai

tum ko apnī nazar bahut kuchh hai

ham ko apnā jigar bahut kuchh hai

tere ḳhvāb-o-ḳhayāl ke sadqe

apnī shām-o-sahar bahut kuchh hai

baat jab hai kisī kā dil rakh le

yuuñ vo mai-gūñ nazar bahut kuchh hai

ye jabīn-e-niyāz kyā lekin

aap kā sang-e-dar bahut kuchh hai

partav-e-dāġh-e-dil se kyā nisbat

yuuñ ziyā-e-sahar bahut kuchh hai

be-usūlī mirā mizāj nahīñ

gāhe-gāhe magar bahut kuchh hai

apnī ḳhātir to umr bhar 'nāzim'

nigah-e-muḳhtasar bahut kuchh hai

tum ko apni nazar bahut kuchh hai

hum ko apna jigar bahut kuchh hai

tere KHwab-o-KHayal ke sadqe

apni sham-o-sahar bahut kuchh hai

baat jab hai kisi ka dil rakh le

yun wo mai-gun nazar bahut kuchh hai

ye jabin-e-niyaz kya lekin

aap ka sang-e-dar bahut kuchh hai

partaw-e-dagh-e-dil se kya nisbat

yun ziya-e-sahar bahut kuchh hai

be-usuli mera mizaj nahin

gahe-gahe magar bahut kuchh hai

apni KHatir to umr bhar 'nazim'

nigah-e-muKHtasar bahut kuchh hai