tumko jiwan mein KHasara bhi to ho sakta hai

tum ko jīvan meñ ḳhasārā bhī to ho saktā hai

jo tumhārā hai hamārā bhī to ho saktā hai

sub.h-dam ye jo sar-e-shāḳh mahakne lagā phuul

tere milne kā ishāra bhī to ho saktā hai

jo samundar ke talātum se nikal aayā hai

us ko tinke kā sahārā bhī to ho saktā hai

tū jo har vaqt yahāñ shikva-kunāñ rahtā hai

is zamāne se kinārā bhī to ho saktā hai

uñgliyāñ yuuñ na mirī raakh meñ phero apnī

raakh meñ koī sharārā bhī to ho saktā hai

ye sar-e-shām jo galiyoñ meñ mahaktī hai hinā

is meñ kuchh haath tumhārā bhī to ho saktā hai

chāñd kā honā zarūrī to nahīñ hai 'ansar'

baat karne ko sitāra bhī to ho saktā hai

tum ko jiwan mein KHasara bhi to ho sakta hai

jo tumhaara hai hamara bhi to ho sakta hai

subh-dam ye jo sar-e-shaKH mahakne laga phul

tere milne ka ishaara bhi to ho sakta hai

jo samundar ke talatum se nikal aaya hai

us ko tinke ka sahaara bhi to ho sakta hai

tu jo har waqt yahan shikwa-kunan rahta hai

is zamane se kinara bhi to ho sakta hai

ungliyan yun na meri rakh mein phero apni

rakh mein koi sharara bhi to ho sakta hai

ye sar-e-sham jo galiyon mein mahakti hai hina

is mein kuchh hath tumhaara bhi to ho sakta hai

chand ka hona zaruri to nahin hai 'ansar'

baat karne ko sitara bhi to ho sakta hai