tumko jo mujhse shikayat hai ki shikwa na karo

tum ko jo mujh se shikāyat hai ki shikva na karo

banda-parvar hameñ har roz satāyā na karo

mehñdī mal kar to na aane kā bahāna na karo

aaj hai vasl kī shab ḳhūn-e-tamannā na karo

tum nikālo mire armāñ mirā matlab ye nahīñ

mujh ko kahnā to ye hai ġhair kā kahnā na karo

tauba tauba mai-e-ulfat ko batāte ho harām

be-piye shaiḳh jī is tarah se bahkā na karo

maiñ kahūñgā tumheñ zālim jo satāoge mujhe

tum jo ye sun nahīñ sakte ho to aisā na karo

haañ mire husn kī tā'rīf pe chiḌhte ho agar

ā.īna dekh ke phir tum mujhe dekhā na karo

apne 'āshiq se munāsib nahīñ is tarah hijāb

aao āñkhoñ meñ mirī shauq se pardā na karo

de ga.e ālam-e-rūyā meñ ye taskīn mujhe

zabt ulfat meñ hai lāzim tumheñ royā na karo

kyā ġhalat hai ye raqīboñ se nahīñ rabt tumheñ

ye bajā tum ne kahā shikva-e-bejā na karo

maiñ koī ġhair kī hasrat nahīñ armān nahīñ

apnī mahfil se mujhe yaar nikālā na karo

un kī paimāñ-shikanī un ko ye sikhlātī hai

karke 'ushshāq se vā'da kabhī iifā na karo

un kā ġhussa nahīñ kuchh qahr-e-ḳhudā hazrat-e-dil

but bigaḌte haiñ to hargiz koī parvā na karo

ġhair se qat'-e-ta'alluq meñ bhalā.ī hai zarūr

haañ agar koī burā.ī ho to achchhā na karo

ḳhāksārī kā sikhātā hai tarīqa mujhe zo'f

kahtā hai baiTh ke is bazm se uTThā na karo

jaan se apnī guzar jaao mohabbat meñ 'fahīm'

naam agar chāhte ho himmat-e-mardāna karo

tum ko jo mujh se shikayat hai ki shikwa na karo

banda-parwar hamein har roz sataya na karo

mehndi mal kar to na aane ka bahana na karo

aaj hai wasl ki shab KHun-e-tamanna na karo

tum nikalo mere arman mera matlab ye nahin

mujh ko kahna to ye hai ghair ka kahna na karo

tauba tauba mai-e-ulfat ko batate ho haram

be-piye shaiKH ji is tarah se bahka na karo

main kahunga tumhein zalim jo sataoge mujhe

tum jo ye sun nahin sakte ho to aisa na karo

han mere husn ki ta'rif pe chiDhte ho agar

aaina dekh ke phir tum mujhe dekha na karo

apne 'ashiq se munasib nahin is tarah hijab

aao aankhon mein meri shauq se parda na karo

de gae aalam-e-ruya mein ye taskin mujhe

zabt ulfat mein hai lazim tumhein roya na karo

kya ghalat hai ye raqibon se nahin rabt tumhein

ye baja tum ne kaha shikwa-e-beja na karo

main koi ghair ki hasrat nahin arman nahin

apni mahfil se mujhe yar nikala na karo

un ki paiman-shikani un ko ye sikhlati hai

karke 'ushshaq se wa'da kabhi ifa na karo

un ka ghussa nahin kuchh qahr-e-KHuda hazrat-e-dil

but bigaDte hain to hargiz koi parwa na karo

ghair se qat'-e-ta'alluq mein bhalai hai zarur

han agar koi burai ho to achchha na karo

KHaksari ka sikhata hai tariqa mujhe zo'f

kahta hai baiTh ke is bazm se uTTha na karo

jaan se apni guzar jao mohabbat mein 'fahim'

nam agar chahte ho himmat-e-mardana karo